Suportado ni Representative Brian Raymund Yamsuan, ang isa ka bag-o nga inisyatiba agud padasigon ang digitalization sa mga operasyon sang lokal nga gobyerno.
Suno sa Kongresista, ang nasambit nga tikang ang nagasuno sa iya adbokasiya kung sa diin ang paggamit sang teknolohiya agud mapadasig nga mahatag ang suporta kag serbisyo nga direkta sa publiko.
Mahibaluan nga ang digitalization initiative sang bag-o nga nga gintalana nga tiglikum sang DILG nga si Secretary Jonvic Remulla indi lamang makabuhin sang red tape sa pagdul-ong sang mga serbisyo sang mga Local Government Units (LGUs) kundi makabulig man sa mga target nga benepisyaryo nga matuod nga nagakinahanglan sang suporta nga ginpondohan sang estado.
Bangud sini, gindayaw ni Yamsuan si Remulla sa iya plano nga digitalization.
Suno sa mamalidha, madugay na niya nga ginaduso ang digitalization kag paggamit sang mga modern nga kagamitan indi lamang para sa mga LGUs, kundi mangin sa Philippine National Police (PNP).
Ginhatagan man sang pagtamod sang mamalidha nga kaangay sang mga body-worn camera para sa PNP kag science-driven investigative tools and processess kung sa diin makabulig sa pag-untat sa krimen, pabaskugon ang pagsalig kag kumpiyansa sang publiko sa mga law enforcers padulong sa isa ka malinong kag matawhay nga komunidad.
Samtang, ginlunsyar man ni Yamsuan ang iya BAON program sa pagpakig-angut sa Department of Social Welfare and Development (DSWD).
Ang BAON program ang kabahin sang isa pa ka programa sang Kongresista ang Health, Opportunities, Peace and Education (HOPE) agenda.
