ROXAS CITY – Padayon nga ginabulong sa isa ka pribado nga ospital ang solterito matapos nga natumba kag bumunggo ang ginamaneho nga motorsiklo sa Sitio Sumiga, Barangay Milibili syudad sang Roxas subong nga hapon.
Ang wala na ginhingadlan nga biktima, ang naga-edad sang 14-anyos kag residente sang Malipayon Village sa nasambitan nga baranggay.
Samtang, ginkilala naman ang driver sang tricycle kay Romy Taburnal, 26-anyos kag residente sang Sitio Arcabalo, Brgy. Milibili.
Sa nakuha nga impormasyon sang Bombo Radyo Roxas nagikan sa traffic section sang Roxas City PNP, padulong si Taburnal kaupod ang pamilya sini sa syudad sang Roxas para kuntani mag-upod sa prusisyon.
Apang pag-abot sa kurbadahon nga porsyon sang dalan, natumba ang menor de edad sa ginamaneho sini nga motorsiklo kag bumunggo sa nasambitan nga tricycle.
Bangud sa natabo, nag-angkon sang kapilasan sa lawas ang biktima.
Sa karon, yara sa kustodiya sang Roxas City PNP ang driver sang tricycle para sa nagakaigo nga disposisyon.
