Solterito nakuryente matapos nagsag-id sa live wire ang ginauyatan nga C-purlins

ROXAS CITY – Nag-angkon sang 3^rd degree burn ang isa ka 16-anyos nga lalaki matapos aksidente nga makuryente samtang nagabulig welding sa iya nga bayaw sa Atiplo Elementary School, sa Barangay Atiplo, Mambusao, Capiz.

Sa pagpakig-angut sang Bombo Radyo kay Amelyn Esteban, magulang sang biktima, samtang nagasakwat sang C-Purlins ang iya manghod, aksidente nga nasag-iran sang iya gina-uyatan ang live wire rason nga ini ang nakuryente kag nahulog.

Bangud diri nalapnos ang panit sa dughan, kamot kag paa sang solterito.

Una nga ginpadangat sa Mambusao District Hospital, apang gilayon gintransfer sa Roxas Memorial Provincial Hospital para sa dugang nga pagbulong.