ROXAS CITY – Ginpadangat sa Roxas Memorial Provincial Hospital (RMPH) ang 18 anyos nga lalaki matapos nga ginlabo sang iya kaugalingon nga amay, sa Barangay Dinginan, Roxas City.
Ginkilala ang biktima kay Milmart Valguma, samtang ang iya amay amu si Patrocinio Valguma, 57 anyos, nga lunsay residente sang nasambit nga barangay.
Sandig sa impormasyon nga nakuha sang Bombo Radyo sa inisyal nga imbestigasyon sang katapo sang Roxas City PNP, ginpahayag nga samtang nagapulupahuway ang biktima sa ila kuwarto, sang nag-abot ang iya amay nga yara sa impluwensiya sang makahulubog nga ilimon kag may bitbit nga bolo, sang hinali nga nagpanglabo nga ginkaigo sang biktima sa iya natuo nga tiil.
Nagluntad ang mainit nga pagbinaisay sa mag-amay kag sang tuyo nga magbangon sang biktima, ginlabo ini liwat nga naigo sa iya ulo.
Matapos ang pagpanglabo, nagpalagyo ang iya amay, apang narekober sa lugar ang bolo nga may kalabaon nga 21 pulgada.
Sa dugang nga pagpangusisa sang mga kapulisan, nahibaluan nga antes paman ang insidente, nagsugid ang biktima sa iya amay nga nagabusong ang iya nobya, apang indi ini mabaton sang iya amay, sa baylo, nagpatunga ang mainit nga diskusyon sa duha kag naglakat ang iya amay.
Sa karon, nakaguwa na sa ospital ang biktima kag nakahunong sa karsel sang Roxas City PNP ang amu nga amay matapos nga boluntaryo nagsungka sa mga kapulisan sa Ivisan, kag ginturnover diri sa syudad.
