ROXAS CITY – Gindakop sang mga katapo sang Cuartero MPS, ang isa ka soltero matapos nga nagpataya sang iligal nga sugal, sa Brgy. San Antonio, Cuartero, Capiz, alas-9:47 kagab-i sang Biyernes, Setyembre 16.
Ginkilala ang nadakpan kay Angelo Gapi Farinas, 18-anyos kag residente sang Brgy. San Nicolas, Tapaz, Capiz.
Sandig sa inisyal nga imbestigasyon ni PSSG Edmer Dayalo, samtang nagapatigayon sang monitoring sa lugar sanday PCpl Jenel Velasco kag PCpl Von Ryan Alon, sang nakita nila ang suspek nga nagapangolekta sang taya sa hampang nga ‘pula-puti.’
Sang nakita sini ang mga pulis, nagtuyo nga magpalagyo si Farinas, apang natigayon ini nga madakpan.
Nakuha sa kontrol kag posesyon sini ang anum kabilog sang Dice sa nanari-sari nga duag kag P1,550 nga kuwarta sa nagkalain-lain nga denominasyon.
Sa karon, yara ini sa paghinakop snag Cuartero MPS, kag natalana nga magapangatubang sang panumbungon nga paglapas sa Presidential Decree 1602 ukon ‘Anti-illegal Gambling Act.’
