ROXAS CITY, CAPIZ- Nangin malinong kag matawhay ang palibot sang syudad sang Roxas kag bilog nga probinsya sang Capiz sa pihak sang pagpatigayon sang rally sang pila ka mga progresibo nga grupo kadungan sang ika-apat nga State of the Nation Address ni Presidente Ferdinand Marcos Jr. sang Lunes, Hulyo 28, 2025.
Sa interview sang Bombo Radyo kay Police Captain Merry Chris Dela Cruz, Police Information Officer sang Capiz Police Provincial Office, iya ginpahayag nga dako ang bulig sang mga pumuluyo pamaagi sa pagpakita sang kooperasyon nga ipabilin ang kalinong kag katawhay sa palibot kadungan sang dako nga kahiwatan sang pungsod.
Sa pihak nga bahin, kadungan sang nasambit nga ika-apat nga SONA sang Presidente, nagpatigayon sang program rally ukon People’s SONA ang nagkalain-lain nga progresibo nga grupo sa Roxas City Bandstand sang hapon sang Hulyo 28, 2025. Ginpangunahan ini sang Bayan-Capiz kaupod ang mga grupo sang Gabriela, Pamalakaya, Kadamay, Kabataan Partylist kag Anakbayan kun sa diin kapin isa ka gatos nga indibidwal ang nagtambong.
Sa nasambit nga program rally sang sini nga mga grupo, ginpanawagan sang mga ini ang mga ginpromisa ni Presidente Marcos sang mga nakaligad nga SONA kaangay sang pagpanubo sa presyo sang bugas kag paghatag sang trabaho sa mga Pinoy sa diin nga suno sa ila wala pagid nagtupa kag indi pa nabatyagan mayad sang mga pumuluyo.
Ginapanawagan man sang mga ini ang pagpasaka sang sweldo kag pagpanubo sang presyo sang mga balaklon, pagpa-untat sa diskriminasyon, red tagging, kag dugang nga pondo sa mga pampubliko nga ospital kag iban pa.
Sa kabilugan nga assessment kag obserbasyon sang Capiz Police Provincial Office, nangin ‘generally peaceful’ ang sitwasyon sa bilog nga probinsya sang Capiz kadungan sang State of the Nation Address ni Presidente Ferdinand Marcos Jr.
With a report from Bombo Sunnie Mae Batencila
