ROXAS CITY – Nagpakigsapol ang representante sang South Korean government sa gobernador sang probinsiya sang Capiz agud ipasalig sa mga biktima sang recruitment scam sang koreano nga si Kim Tae Hayeong kag Capizeña nga si Ramilyn Andrade nga handa magbulig ang ila gobyerno.
Ginpahayag ni Governor Esteban Evan Contreras II nga personal nga nagpakigkita sa iya ang representante sang South Korea kasunod ang pasalig nga buligan nila ang mga biktima kag indi pagpahanugutan nga makabiya sa Pilipinas si Kim tobtob indi ma-settle ang ginapangatubang sini nga problema.
Ginpasalig man sang gobyerno probinsiyal nga ila buligan ang mga biktima agud ila makuha ang hustisya.
Nahibaluan nga naglab-ot na sa 100 counts sang kaso nga syndicated estafa ang natigayon nga mapasaka batuk kanday Andrade kag Kim.
Matandaan nga masobra sa 200 ka mga indibidwal ang natuntuhan sang duha matapos ginpromesahan nga buligan nga makatrabaho sa South Korea bilang factory workers, kabaylo sang daku nga kantidad nga ginbayad kay Andrade.
