ROXAS CITY – Wala nagapamatuk ang Sangguniang Panlalawigan sa pagpanghatag sang gobernador sang P1 million nga pondo sa mga kabanwahanan para gamiton sa ila mga lihok batuk sa coronavirus disease (COVID-19).
Ini ang ginpahayag ni Board Member Jonathan Sonny Besa sang mainterview sang Bombo Radyo.
Suno kay Besa nga wala ini sang may nakita nga kalainan sa paghatag sang gobernador sang ayuda sa mga kabanwahanan nga tuman nga kahilanglanon subong bangud sang COVID-19 pandemic.
Dugang pa sini nga ginrekomendar sang konseho nga dugangan sang isa ka milyon ka pesos ang ayuda sang siyudad bangud madamo ang mga kabaranggayan kag dako ang populasyon diri.
Apang gin-athag ni Besa indi pa mapanghatag ang budget sa mga kabanwahanan bangud wala pa napirmahan sang gobernador ang appropriation ordinance natuhoy diri.
Sa pihak nga bahin, ginapanindugan ni Besa nga gin-zero budget sang SP ang talatapan sang Hotel Management Service kag Special Concern Office bangud ginapahayag nga ilegal ang pagtukod sini.
Suno kay Besa indi mahimo nga mahatagan sang pondo ang gintukod nga talatapan sang gobernador bangud wala ini nag-agi sa tama nga proseso kag gintukod gid lamang pinaagi sa isa ka Executive Order.
Gin-athag sini nga antes magtukod ang gobernador sang isa ka talatapan nga wala sa pagsulundan sang Local Government Code, kinahanglan pa ini nga mag-agi sa Sanggunian.
