Nagapangasubo ang football community sa Spain sa kamatayon sang CD Tenerife striker nga si Jesus de Miguel, kasunod sang cardiac arrest nga iya naangkon pagkatapos sang pagbunggo sa hampang batok sa FC Andorra.
Nagluntad ang insidente sang nakabunggo si De Miguel sa goalkeeper nga si Jesus Owono, nga nagguwa sa iya penalty area agud sugataon ang bola.
Naigo sang tuhod sang goalkeeper ang dughan sang striker nga gilayon nga natumba kag nadulaan sang animo sa tunga-tunga sang hampang.
Gilayon ini nga ginbulong sang medical team sa sulod sang pitch antes gindala sa ospital. Apang, wala ini nakalampuwas kag ginkumpirmar sang iya team sa Tenerife ang iya pagtaliwan sang Martes.
Bangud sa trahedya, ginpaisol sang Spanish Football Federation ang tanan nga natalana nga hampang para sa Martes.
Matandaan nga nag-intra si De Miguel sa Tenerife antes ang 2025-2026 season kag nakarekord sang 11 goal sang nagligad nga season.
