ROXAS CITY – Ginkaalarma sang pamunuan sang Panit-an National High School ang nabaton nga death threat sang mismo principal kag pila ka mga manunudlo sang buluthuan bangud sa ginapahayag pagpanukot sang monetary contribution sa ginikanan sang mga estudyante.
Sa interview sang Bombo Radyo Roxas sa school principal nga si Mr. Ronilo Tu, may ginhatag sa iya nga sulat si Jeffry Dorde sang Barangay Intampilan sang nasambit nga banwa.
Apang ginkakibot sini sang iya nabasahan nga kaundan sang sulat ang mga tinaga nga nagapamahog sa iya kabuhi kag sa pila ka mga manunudlo.
Nasaad sa sulat nga kun indi pag-ibalik sang eskwelahan ang ginpabayad nga kwarta sa mga ginikanan, pagahiwaon ang tiyan sang principal kag pagabitayon ang ulo sini kaupod ang iban pa nga mga manunudlo.
Bangud naalarma gilayon ini nga ginparekord ni Tu kag iya ginkakibot sang nakit-an nga nagaanggid ang penmanship ni Dorde sa nakasulat nga death threat.
Bangud diri, nagpanawag sa pulisya si Tu kag gilayon man nga gin-aku ni Dorde nga siya ang nagsulat sang nasambit nga death threat.
Gin-athag naman ni Tu nga ang ginatumod nga balaydan sa nasambit nga sulat ang ginkasugtan mismo sang mga ginikanan sa ginpatigayon nga Parent-Teacher Association (PTA) meeting nga ila paggagamiton sa pagpatukod sang waiting shed.
