ROXAS CITY – Ginahulat sa karon sang Provincial Health Office (PHO) Capiz ang resulta sang confirmatory test sa specimen sample sang 51-anyos nga lalaki nga ginakabig nga Person Under Investigation (PUI) matapos nakitaan sang pila ka mga sintomas sang 2019 Novel Coronavirus Acute Respiratory Disease (nCoV-ARD).
Ini ang ginpahayag sang tagpamaba sang PHO-Capiz nga si Mr. Ayr Altavas sang mainterview sang Bombo Radyo Roxas.
Mahibaluan nga gilayon nga ginpaidalom sa 14-day hospital quarantine ang wala na ginhingadlan nga lalaki nga isa ka Filipino citizen nga may yara sang travel history sa Hongkong kag Macau sadtong Enero 25 tubtob Enero 29, 2020 antes nagpauli sa probinsiya.
Sa karon yara na sa Research Institute for Tropical Medicine (RITM) sa Alabang, Muntinlupa City ang specimen sample sini kag ila pa nga ginahulat ang resulta sang amo nga eksaminasyon.
Gin-athag naman ni Altavas nga ang mga (PUIs) amo ang mga indibidwal nga may travel history sa mga pungsod nga apektado sang amo nga balatian partikular na sa China kag may yara sang mga sintomas kapareho sang hilanat, ubo kag sip-on.
Samtang ang mga Person Under Monitoring o (PUM) naman amo ang mga indibidwal nga may travel history man sa amo nga pungsod apang wala nakitaan sang nasambit nga mga sintomas apang nagakadapat sa gihapon ini nga magpaidalom sa home quarantine.
Nagpanawagan naman ini sa publiko nga magpabilin nga kalmado apang mangin alerto bangud ginahimo nila ang tanan agud indi makasulod sa probinsiya ang amo nga balatian.
