ROXAS CITY – Nagpaguwa na sang official statement ang Provincial Health Office (PHO) agud klaruhon ang ginaalegar kamatayon sang lalaki nga ginakabig nga Person Under Investigation (PUI) sa Roxas Memorial Provincial Hospital.
Ba-se sa official report sang Roxas Memorial Provincial Hospital nga ang PUI No. 14 nagapang-edaron sang 30-anyos kag may travel history sa Tondo, Manila.
Nag-abot ini sa Roxas City sang Marso 15, sakay sa Roll On-Roll Off (RoRo) vessel sa Culasi Port.
Marso 16 sang nagpakunsulta ini sa RMPH bangud sa ginasuprer ubo kag kabudlayan sa pagginhawa sa sulod sang isa ka bulan.
Bangud diri ginkabig ang pasyente nga PUI kag ginpaidalum sa quarantine sa amo nga adlaw.
Sa pagtsekyar sang doctor on duty na-diagnose ini nga nagsuprer sang Rheumatic Heart Disease.
Ginhatagan man ini sang nagakaigo nga pagbulong apang sang Marso 19, nagsuprer sang chest pain ang pasyente tobtob napatay.
Nagaguwa karon nga napatay si Patient 14 bangud sa acute pulomonary edema secondary to congestive heart failure.
Ginpahayag ni Dr. Lea del Rosario nga natalana ipadala sa Research Institute for Tropical Medicine (RITM) ang specimen sang pasyente agud maathagan ang tanan.
Nahibaluan nga nagkuha sang special flight ang Department of Health para magpangkuha sang mga specimen sang ginapatihan napatay bangud sa COVID-19, apang bangud sa sitwasyon sa karon daku nga problema ang pagpadala sini sa RITM.
Samtang ginpahayag nga ang medical staff sang ospital nga nagtatap sa nasambit nga pasyente ang ginpaidalum na sa quarantine.
Nauna diri, naglapta ang balita nga napatay si Patient 14 bangud sa COVID-19.
