Ginpamatud-an sang isa ka Special Education (SPED) teacher nga indi kabangdanan ang pisikal nga limitasyon sa lawas agud makahatag sang kalidad nga edukasyon kag inspirasyon sa mga estudyante.
Sa interview sang Bombo Radyo kay Lucia Binibini, SPED Teacher 1 sang Dao Elementary School kag isa ka visually impaired, iya ginpahayag nga bisan pa sa mga kabudlayan nga iya naagyan tungod sa iya kahimtangan, wala ini nangin kabangdanan agud mag-untat siya sa pag-abot sang iya handum nga mangin manunudlo.
Suno kay Binibini, ang iya handum bilang isa ka manunudlo nagapakita nga ang kakulangan sa panulok wala nagakahulugan sang kakulangan sa ikasarang kag dedikasyon sa pagserbisyo sa kabataan. Iya man ginpabutyag nga pinaagi sa edukasyon, mahimo niya nga mapadasig ang mga estudyante nga magpadayon bisan pa sa mga kabudlayan nga ila ginaatubang sa kabuhi.
Nagapati man siya nga importante ang paghatag sang patas nga oportunidad sa mga persons with dissability agud mapakita nila ang ila talento, abilidad kag kontribusyon sa komunidad.
