Ginpakigbahin ni Provincial Agrarian Reform Program Officer II Alona D. Albances kun ano ang ginatawag nga Support to Parcelization of Lands for Individual Titling ukon SPLIT Project sang Department of Agrarian Reform.
Suno kay Albances nga ang SPLIT Project amu ang espesyal nga programa sang DAR kag tinutuyo sang amu nga proyekto nga pahat-pahaton ang mga titulo sang isa ka Colllective Certificates of Land Ownership Award ukon Collective CLOA nga may 50 tubtob 100 nga mangunguma nga isa lang ang ila titulo.
Pinaagi sa SPLIT Project, mahatagan sang tig-isa ka titulo ang mga benepisyaryo ukon mangunguma kag makaangkon sang ila kaugalingon nga duta.
Ini sandig sa Administrative Order No.1 series of 2021 kag gin-amyendaran sa Administrative Order No. 2 series of 2024.
Dugang pa ni Albances nga nagsugod ini nga proyekto sang DAR sang tuig 2021 kag ginalauman nga matapos sa 2027 ang pag-distribute sang mga titulo sa ARBs diri sa probinsya sang Capiz.
Ginahaylo man sang talatapan sang DAR-Capiz ang mga Agrarian Reform Beneficiaries nga mangin member sang ARBO ukon Agrarian Reform Beneficiaries Organization agud maka-avail sang mga support services kag mangin maayo ang kalidad sang ila pangpangabuhi pinaagi sa paghatag sang training sang DAR kasubong sang livelihood projects kag iban pa.
Samtang, pahanumdom naman ni Albances nga bukas ang talatapan sang DAR-Capiz sa mga may luyag pa nga mahibaluan nga mga impormasyon angut sa mga programa sang nasambit nga ahensya.
