Nagsabatanay sa social media si Senador Robin Padilla kag si spokesperson for the West Philippines Sea Rear Admiral Jay Tarriela matapos nga ginpagwa sang state-backed media nga China Daily ang AI-generated video nga nagalaragway sa mga Pilipino bilang mga amo.
Una diri, ginhangkat ni Tarriela sanday Senators Padilla kag Alan Peter Cayetano nga ipilit ang China nga magdemanda sang public apology gikan sa mga Pilipino, kaangay sang ila nauna nga panawagan batuk sa paggamit sang caricature ni Chinese President Xi Jinping.
Sa iya post sa Facebook, ginpahayag ni Padilla nga si Tarriela ang ginpahayag nag-umpisa sang inaway paagi sa pagpalapta sang suno sa iya “wartime propaganda.” Ginpanindugan man sang senador nga indi dapat pagpakanubuon ang relasyon sang Asian kag Austronesian races.
Samtang, gin-athag naman ni Tarriela nga indi propaganda ang transparency initiative sang PCG kundi isa ka pamaagi agud ipakita ang ginaalegar harassment kag agresyon sang China sa mga Filipino nga mangingisda kag mga sakayan pandagat sang PCG kag Bureau of Fisheries and Aquatic Resources (BFAR). Suno sa iya, wala sila nagahimo sang mga insidente kundi nagadokumento lamang.
Ginpanindugan pa ni Tarriela nga insulto sa mga Pinoy ang AI-generated video sang China Daily kag indi dapat pagbatunon.
Matandaan nga makita sa video ang amo nga nakasuksok sang Barong Tagalog kag salakot, samtang ginainsulto ang 2016 Arbitral Award nga nagkilala sang kinamatarong sang Pilipinas sa West Philippine Sea.
