Roxas City – Ginpabugal sang outgoing Sports and Business Affairs Consultant sang gobyerno probinsyal ang mga nahimuan sini sa iya pagpungko sa Villareal stadium sa administrasyon ni outgoing governor Antonio del Rosario.
Sa exclusive interview sang Bombo Radyo kay Mrs. Carmen Andrade, ginpahayag sini nga halos tanan nga mga pasilidad ang na-repair na sa Villareal Stadium.
Ginpabugal man sini ang na-income ang probinsya nga kapin 12 milyones pesos.
Suno kay Andrade nagpa-in sang pondo si outgoing governor Del Rosario sang 48 milyones pesos sa diin ginamit ini para sa pagrepair kag pagbag-o sang mga pasilidad sa stadium.
Kalakip man diri ang nangin preparasyon sang ginpatigayon nga Western Visayas Regional Athletic Association ukon WVRAA meet 2019 nga ginhiwat mismo sa probinsya sa diin madamo ang nagdayaw diri.
Dugang pa sini nga nakabulig man sang dako para sa mga atleta sang probinsya ang maayo nga pasilidad sa ila nga paghanas rason nga madamo ang nakakuha sang mga bulawan kag silver nga medalya subongman ang paghatag sa ensakto nga oras sang insentibo sa mga atleta.
Ginkumpara man ni Andrade ang pagganar sang 5.8 milyones pesos sang nagligad nga administrasyon sa sulod sang tatlo ka tuig kumpara sa administrasyon ni del Rosario nga nakatipon sang P7 milyones sa sulod sang tatlo ka tuig.
Nagapakita lamang ini suno kay Andrade nga wala nila ginakurakot ang ginaganar sang Villareal Stadium.
