ROXAS CITY – Preparado na ang mga sports fanatics kag subong man ang mga bettors ukon manugpusta sa pagsugod sang Game 1 sa best of seven series sang 2022 NBA Finals, nga magaumpisa alas-9 sa aga, buwas nga adlaw sang Biyernes, oras sa Pilipinas.
Sa interview sang Bombo Radyo kay Bombo International Correspondent Mr. Raffy Fernando, direkta sa Indiana, USA, ginpahayag sini nga madamo na ang may tickets kag panigurado nga mapuno ang Chase Center sa amu nga hinampang, kag apisar sa Game 3 kag Game 4, may mga nagapareserve na nga mga fanatics.
Ginapahayag nga kapin $600 ang presyo sang ticket sa pinakamalayo nga puwesto, kun sa diin, halos indi mo na sini makita ang mga nagahampang.
Para kay Fernando, abanse ang Golden State Warriors kag may posibilidad nga pagatapuson sang Warriors ang hinampang sa Game 5 ukon Game 6.
Pag-abot sa pustaanay, indi lamang ang kun sin-o nga hubon ang magadaog ang ginapustaan, kundi pati man ang kun sin-o ang una nga maka-rebound, una nga maka-shoot, pinakamadamo nga matira nga three points, kag madamo pa, kag indi basta-basta ang presyo sang dolyares nga ginapusta diri.
Nahibaluan nga legal sa Estados Unidos ang pustaanay sa kaangay nga aktibidad kag isa ang basketball nga sports sa ginagastuhan sang mga Amerikano.
