Nangin bayani si Victor Wembanyama matapos niya ginpangunahan ang San Antonio Spurs sa 115-108 nga kadalag-an kontra sa Minnesota Timberwolves sa Game 3 sang ila Western Conference semifinals series.
Nagtala si Wembanyama sang 39 points, 15 rebounds kag lima ka blocked shots para dal-on ang Spurs sa 2-1 nga abanse sa best-of-seven series. Nagdugang man si De’Aaron Fox sang 17 points samtang si Stephon Castle naman ang may 13 points kag 12 assists.
Bisan nakaapas ang Timberwolves gikan sa 15-point deficit sa first quarter, wala gihapon nila mapunggan ang kusog sang Spurs sa crucial nga bahin sang duwa. Nakaangkon pa sang tsansa ang Minnesota nga maglapit sa 106-103 matapos ang tres ni Naz Reid sa final minutes, apang dayon man nga nagsabat si Wembanyama pinaagi sa isa pa ka three-pointer para mapaseguro ang kadalag-an sang Spurs.
Sa bahin sang Timberwolves, nanguna si Anthony Edwards nga may 32 points kag 14 rebounds, samtang nagdugang si Reid sang 18 points kag si Jaden McDaniels sang 17 points.
Nag-init man ang emosyon sa third quarter matapos matumba si Dylan Harper sa salpukan nila ni McDaniels, nga nagtuga sang gamay nga komosyon sa sulod sang court antes nga ginpakalma sang mga opisyal.
