ROXAS CITY – Ginaganyat karon sang pamunuan sang Social Security System (SSS) ang mga delingkwente nga mga employers nga napaslawan nga ma-remit ang kontribusyon sang ila mga empleyado nga hingalitan ang Contribution Penalty Condonation program sang ahensiya.
Ginpahayag ni Dr. Lilani Benedian, Vice President for Visayas West 1 kag concurrent acting Vice President Visayas West 2 division nga tumalagsahon lamang ini nga opurtunidad nga ginahatag sang SSS agud indi magbayad sang multa ang mga employers nga wala nabayaran ang kontribusyon sang ila mga empleyado.
Nagsugod ang program sang bulan sang Marso kag magatakup ini sa Septiembre 1, 2019.
Ginklaro ni Benedian nga sa pag-avail sang programa, ang premium contribution lamang ang pagabayaran sang employer kag wala ini sang penalidad.
Sa mga employer naman nga wala sang kapasidad nga bayaran ang kabug-usan nga kantidad mahimo sila mag-avail sa installment proposal sa diin may 6 porsyento nga interest.
Sa sin-o nga luyag maka-avail sa programa, mahimo lamang nga magpadulong sa SSS office.
Nagpahanumdum man si Benedian sa mga employer nga indi magpa-kumpyansa kag balewalaon ang pagbayad sa kontribusyon sang ila mga empleyado, bangud may penalidad nga nagahulat sa magalapas sa nasambit nga pagsulundan.
Nahibaluan nga ang Contribution Penalty Condonation program ang santu sa Republic Act 11199 ukon Social Security Act of 2018.
