ROXAS CITY — Nagpaandam sa karon ang Social Security System nga ipaidalum man nila sa ‘Tokhang’ ang mga employer nga wala nagabayad sang ensakto nga kontribusyon sang ila nga mga empleyado sa ahensya.
Ginpahayag sa Bombo Radyo Roxas ni SSS – Capiz provincial manager Rene Moises Gonzales nga ginsuguran na nga sang ahensya ang ila nga bersyon sang ‘tokhang’ batuk sa mga pasaway nga mga employers sa mga nagapanguna nga syudad sang pungsod.
Suno kay Gonzales, sa idalum sang nasambit nga tikang, personal nga ginapadulungan sang SSS ang mga kumpanya nga namonitor nila nga wala regular nga nagabayad sang SSS contribution sang ila nga mga trabahador kag ginaganyat nga magsunod sa SSS law.
Kun nagapakatig-a ang nasambit nga mga employers pasakaan nila ini sang nagakaigo nga reklamo nga paglapas sa SSS law.
Kasunod sini, gingangat ni Gonzales ang mga employers nga magbayad sang ensakto kag regular nga kontribusyon sang ila nga mga empleyado sa SSS kag indi na paghulaton nga matokhang sila kag mahuy-an sa publiko.
