ROXAS CITY -Makabaton sang ayuda gikan sa Unemployment Benefit Program ang mga miyembro sang Social Security System nga nadulaan sang trabaho kasunod sang Covid-19 Disease Pandemic.
Ini ang ginkompirmar ni Mr. Rene Moises Gonzales, Branch Manager sang Social Security System Capiz Branch sang mainterview sang Bombo Radyo.
Ginpahayag ni Gonzales nga makabaton sang kapin P20,000 nga ayuda ang mga miyembro sini nga nadulaan sang trabaho kasunod sang Covid-19 disease nga sarang mabaton sa sulod sang duha ka bulan.
Apang gin-athag ni Gonzales nga kinahanglan nga personal ang pag-apply sang mga luyag makabaton sang nasambit nga ayuda.
Gindugang pa sini nga may yara sang mga rekesitos nga kinahanglan i-comply sang aplikante agud makabaton sang ayuda.
Suno kay Gonzales kinahanglan na magsumiter sang certification of involuntary separation ang aplikante nga ginatsekyar sang Department of Labor and Employment (DOLE), kinahanglan man nga active contributor ang aplikante sa diin nakatigayon nga makahulog sang kapin 18 months sa kontribusyon sa SSS antes nadulaan sang trabaho.
Samtang ginklaro man sini may posibilidad nga mas manubo sa P20,000 ang mabaton sang iban nga mga benepisyaro bangud nakadepende ini sa monthly contribution sang isa ka aplikante.
Mahibaluan nga kapin 1 billion pesos ang ginpundo sang gobyerno sa masobra 60,000 ka ginalauman nga benepisyaryo sang unemployment program sang nasambit nga ahensya
