ROXAS CITY – Matuod nga nagatan-ay ang St. Joseph High School sang libre nga pag-eskwela sa tanan nga mga kabataan nga luyag makatapos sang ila pagtuon.
Sa interview sang Bombo Radyo kay Rev. Fr. Gybbyn Gumban St. Joseph Tech. Vocational Director, ginpabugal sini nga bukas ang ila buluthuan sa tanan nga mga estudyante katoliko man ukon indi, ilabi na sa mga labing nagakinahanglan.
Mahibaluan nga nagsugod sila sa pagpatigayon sang libre nga pagpa-eskwela sadtong 2021 kun sa diin ginatan-ay sang amu nga buluthuan ang libre nga Tuition Fee, Miscellaneous Fee, Laboratory Uniform, Laboratory Consumable, kag student Insurance.
Pila sa mga kurso nga mahimo pilian sang mga estudyante amu ang Accounting Business Management (ABM), Humanities and Social Sciences (HUMSS), Carpentry, Shielded metal arc welding (SMAW), Cookery, kag Bread and Pastry.
Sa mga luyag magpa-enroll, mahimo lamang nga magsubmit sang mga masunod nga dokumento; Baptismal Certificate, Live Birth, Form 137 nagikan sa buluthuan kun sa diin naggradwar kag kopya sang card.
Suno kay Fr. Gumban nga sa ila pagsugod sadtong 2021 may yara lamang sila nga 130 ka mga estudyante ang nagtapos apang pag-abot sang 2022 naglab-ot na ini sa 187 nga mga estudyante.
Sa karun may yara na sang 152 nga mga estudyante ang naka-enroll sa ila buluthuan kag kapin 300 tubtob 400 pa ang ila nga kinahanglan.
Nagalaum man sanday Fr. Gumban nga mapadayon pa ini kag magadako ang numero sang mga estudyante nga magpa-enroll sa ila.
Samtang, indi lamang nagapokus ang buluthuan agud tun-an ang mga estudyante sa ila kurso nga ginpili apang, subong man pag-abot sa physically, mentally, emotionally kag spiritually ginatutukan man nila.
Magatakop naman ang ila pag-enroll tubtob sa Agusto 22, 2023, gani panugyan sini sa tanan nga mga estudyante kag ginikanan indi na magduha-duha kag magpalapit na sa ila bangud dako ini nga bulig para sa tanan.
