ROXAS CITY – Ginsuportahan naman sang isa sa mga staff sang Panay Municipal Accounting Office nga kalakip sa nagrelease sang pondo sa mga benepisyaryo sang Social Amelioration Program (SAP) ang nangin pahayag sang MSWDO sang Panay.
Suno kay Lourdes Buco nga natandaan sini si Jovanie Candelario nga iya mismo na-estorya sang adlaw nga nagrelease sang tag P6,000 nga SAP sa mga benepisyaryo sa Barangay Pawa, Panay.
Apang imposible ang alegasyon ni Candelario nga nakabaton ini sang amo nga kantidad, apang ginbawi lamang, bangud paano marelease ang kantidad sa tagreklamo kun wala ini nakapirma sa payroll sa diin natukiban pa nga indi siya kwalipikado sa program.
Ginapanindugan ni Buco nga nagabutig lamang ang tagreklamo kag ila sarang mapamatud-an nga wala ini nagbaton kag wala nakuhaan sang laragway nga ginauyatan ang P6,000 kag wala nakapirma sa payroll nga mabaskuG nga balasehan nga indi ini benepisyaryo sang ayuda sang gobyerno.
