Isa ka daku nga hangkat subong para sa Gilas Pilipinas samtang nagahilapit na first window sang 2027 FIBA World Cup Asian Qualifiers.
Ini bangud indi makasulod sa national basketball team ang isa sa ila star players nga si Kai Sotto.
Suno sa kampo sang 23-anyos nga si Sotto, naga-ayo pa ini bangud sa ACL injury sa iya wala nga tuhod.
Matandaan nga si Sotto ang na-injury sang Enero samtang nagahampang sa Japan, nga nagakinahanglan sang siyam ukon tubtob isa ka tuig nga rehab.
Bilang tal-us ni Sotto amo si Quentin Milora-Brown nga maga-abot sa pungsod antes ang pormal nga pagsugod sang rehearsals sang Gilas sa Nobyembre 18.
Ang ranked 37th nga Gilas Pilipinas ang magapaindis-indis sa Guam sa Nobyembre 28 kag sa Disyembre 1 patigayunon ang hampang sa Pilipinas.
