ROXAS CITY – Gindeklara na ang state of calamity sa banwa sang Pontevedra sa probinsiya sang Capiz kaina sang hapon kasunod sang ginpatigayon nga special session sang Sangguniang Bayan sang Pontevedra.
Kalakip ang banwa sang Pontevedra sa dose ka banwa sa Capiz nga lubos nga naapektuhan sang pagbaha sa diin labi nga nahalitan ang mga punong nga nagaserbe nga palangabuy-anan sang mga residente.
Sa exclusive interview sang Bombo Radyo Roxas kay Mayor Esteban Evan Contreras, ginpahayag sini nga nakasugtan nga ipaidalum na sa state of calamity ang ila nga banwa para magamit ang calamity fund sa pagbulig sa kinahanglanon sang apektado nga mga pumuluyo.
Ginabulubanta nga nagalab-ot sa 500 hectares ang nangin kahalitan sang punong bangud sa pagbaha nga epekto sang pag-ulan.
Samtang may bulig nga ihatag ang local government unit sang Pontevedra sa mga tag-iya sang punong sa diin makabaton sila sang semilya sang bangrus.
Nahibaluan nga ikaduha na nga banwa ang Pontevedra nga nagdeklara sang state of calamity sa diin kahapon una nga nagdeklara ang banwa sang Panit-an.
