ROXAS CITY – Natalana ang state funeral ni anay Prime Minister Shinzo Abe sa Setyembre 27 nga pagahiwaton sa Nippon Budokan sa central Tokyo.
Sang mainterview sang Bombo Radyo ginpahayag ni Mr. Josel Palma, Bombo International Correspondent sang Japan nga ang Japanese government partikular ang miyembro sang gabinete ang nagdesisyon sini apisar na- cremate na ang bangkay ni Abe.
Bangud man nga si Abe ang pinakadugay nga nagserbe bilang Prime Minister sang masobra 8 ka tuig, nangin maayo man ang iya pagpungko kun sa diin nasolusyunan ang pila ka mga isyu sa pungsod Japan kag nakaangkon sang dalagkuan nga achievements sa domestic kag foreign policy.
Suno diri, si Prime Minister Kishida Fumio ang magaserbe bilang funeral committee chairperson kag ang gobyerno ang magagasto para sa nasambit nga seremonya.
Pagabatunon man ang luyag magtambong gikan sa iban nga pungsod ilabi na ang may diplomatiko nga koneksyon sa pungsod Japan.
Mahibaluan ang state funeral ang gina-organisar kag ginagastusan sang gobyerno agud hatagan sang kadungganan kag pagkilala ang prominente nga persona ukon isa ka mataas nga opisyal nga naghatag sang malawig, talalupangdon kag maayo nga pagserbisyo sa iya nasyon pinaagi sa isa ka seremonya nga bukas sa publiko.
Ikaduwa na ini nga state funeral nga pagahiwaton para sa nagtaliwan nga Prime Minister matapos ang postwar sa Japan kun sa diin ang una natabo pa sadtong 1967 sang napatay si Yoshida Shigeru.
Ginsundan naman ini ni Shinzo Abe nga amu ang ikaduwa sang ginluthang-patay siya sadtong Hulyo 8 samtang nagahatag sang campaign speech sa Nara City, Japan.
