Opisyal na nga ginpaidalom sa state of calamity ang bug-os nga syudad sang Manila kasunod sang pagbaha tuga sang wala untat nga pag-ulan.
Sa special session sang Sangguniang Panlungsod sang Manila, nagdesisyon sila nga ipatuman ang deklarasyon subong nga adlaw.
Tinutuyo sini nga magamit gilayon sang mga kabarangayan sa syudad ang ila tagsa ka calamity funds sa paghatag sang bulig kag dugang nga bulig sa mga nasakupan.
Ini ang sandig man sa hingyo sang karon nga alkalde sang Manila bangud sa indi mapanginwala nga epekto sang pag-ulan sa syudad.
Samtang, subong nga adlaw, ginlunsar ang nagapadayon nga ‘declogging operations’ sa mga drainage kasunod sang pagbaha nga gina-eksperyensyahan sang ila lugar.
Kon sa diin personal nga gin-usisa ni Mayor Francisco ‘Isko’ Moreno Domagoso ang mga dalan nga nalumos pa sa baha kaangay sang Taft Avenue.
Sa iya pag-abot sa gwa sang Philippine General Hospital, ang mga yara sa ‘gutter deep level’ ang ginsugata sang tubig-baha bangud sang halos wala untat nga pag-ulan.
Gani, ginpakigbahin sini nga padayunon nila ang pagpanglimpyo sang mga kanal tubtub maghagan-hagan ang baha.
Partikular nga sa bahin sang United Nations Avenue, Pedro Gil St, General Malvar St, tubtub sa bahin sang Vito Cruz, may yara pa sang natipon nga baha gikan sa pagbunok sang ulan.
Ginsiling sini nga nagakooperar ang Metropolitan Manila Development Authority ukon MMDA sa padayon nga pagpanglimpyo sang mga drainage sang syudad.
Samtang ginpasalig naman ni Mayor Isko Domagoso nga ‘passable’ ukon maagyan sang nagkalain-lain nga sahi sang salakyan ang mga dalanon sa Manila nga nalumos sang baha humalin sang nagligad nga mga inadlaw.
