Nagpromisa ang state witness nga si anay DPWH Undersecretary Roberto Bernardo nga ibalik ang kabug-osan nga P1 bilyon sa kaban sang gobyerno bilang kabahin sang restitution bangud sa iya pagpasulod sa Witness Protection Program.
Nauna na man nga nakabalik si Bernardo sang sobra P500 milyon sa gobyerno. Sa iya pagtestigo sa bail hearing nanday Ramon Revilla Jr. sa Sandiganbayan, gin-ako sini ang iya papel sa ginapatihan korapsyon sa flood control projects, lakip na sa Pandi, Bulacan.
Ginpahayag man ni Bernardo ang tatlo ka insidente sang ginapatihan milyon-milyon nga cash delivery kay Revilla sang 2024 kag 2025, kag ang ginahingadlan nga 25% commitment para sa infrastructure projects, lakip ang ginapatihan “ghost” project sa amu nga lugar.
Suno pa kay Bernardo, ginmanduan siya ni Revilla nga makigkoordinar nanday anay DPWH Secretary Manuel Bonoan kag sa nagtaliwan nga si USec. Catalina Cabral agud mapasulod ang proyekto sini sa 2025 General Appropriations Act.
