Stephen Curry, liwat nga naghimo sang record matapos magbubo sang 56 ka puntos kag 12 3-pointers sa kadalag-an sang GSW kontra Magic

Liwat nga naghimo sang record si NBA Superstar Stephen Curry sa kadalag-an sang Golden State Warriors batuk sa Orlando Magic, 121 – 115.

Nahimu ni Steph nga magbubo sang 56 points sa kadalag-an sang GS kag nasulod ang 12 3-pointers halin sa 19 nga iya ginbuy-an sa kabug-usan sang hampang.

Ini na ang ikatatlo nga kahigayunan nga nahimo ini ni Curry sa iya karera.

Magluwas sa impresibo nga tres, nasulod man ni Curry ang tanan nga 12 free throws.

Suno sa record sang NBA, ini na ang ika-45 nga hampang sa karera ni Curry nga nakahimo siya sang siyam ka 3-pointers ukon masubra pa.

Ang nasambit nga record ang pinakamataas sa bug-os nga liga. Sumunod sa iya amo ang shooter nga si Damian Lillard nga may yara lamang sang 14 ka games.