Ginpasaka na sang state weather bureau ang storm surge warning sa pila ka mga baybayon sa Luzon kag Visayas bangud sa bagyo Ramil.
Suno kay state meteorologist Bennison Estareja, nagapaandam ang isa tubtob duha ka metro (1-2m) nga kataason sang alimpulos sa mga baybayon sa eastern seaboard.
Ginakalakipan ini sang mga probinsya sang Albay, Aurora, Camarines Norte, Camarines Sur, Catanduanes, Eastern Samar, Isabela, Northern Samar, Quezon, Western Samar, kag Sorsogon.
Panugyan ni Estareja sa publiko, likawan anay ang pagpadulong sa mga baybayon nga sakop sang mga nasambit nga probinsya.
Mahimo man nga maglab-ot sa coastal communities ang mga matag-as nga alimpulos, rason nga ginaabisuhan ang mga lokal nga gobyerno nga bantayan ang sitwasyon sa mga ini kag magpatigayon sang pre-emptive evacuation kun kinahanglan.
