Ginakabig na nga “high-risk area” ang Strait of Hormuz para sa mga Pinoy crew members sa tunga sang nagapadayon nga kinagamo sa Middle East.
Ini ang gin-anunsyo ni Department of Migrant Workers USec. Bernard Olalia matapos ang mas ginpalawig nga advisory para sa maritime sector, sa diin ang kritikal nga ruta para sa oil shipments ang ginakabig na sa subong nga delikado nga lugar.
Magahatag man ini sang rason para sa mga Filipino seafarers nga nagpamalibad nga magsakay sa mga barko nga magapadulong sa nasambit nga channel.
Nahibaluan nga ang Strait of Hormuz ang nahamtang sa tunga sang Iran kag Oman, kun sa diin nagaagi ang 1/5 sang kabug-usan nga konsumo sang gatong sa kalibutan.
Ginakabig man ini nga pinakaimportante nga ruta sang pag-export sang ginabyahe nga langis nga naka-connect sa pinakadaku nga mga manufacturers sa Middle East kaangay sang Saudi Arabia, Iran, Iraq, United Arab Emirates, Gulf of Oman kag Arabian Sea.
Apang, bangud sang nagapadayon nga pag-atake sang US kag Israel sa Iran, mas nangin kritikal ang sitwasyon sang nasambit nga alagyan nga nakaapekto sa presyo sang gatong sa nagkalain-lain nga bahin sang kalibutan.
