Ginakalingawan subong online ang ginhingadlan nga “Stir Fry CEO” sa Yantai, China bangud sa iya pinasahi nga estilo sa pagbaligya sang street food.
Ang lalaki nga si Xiao Lu nagaluto sang stir fry samtang nagsuksok sang business suit imbes nga ordinaryo nga panapton pangkusina.
Nag-umpisa siya pagbulig sa negosyo sang ila pamilya sang 17 anyos pa lamang. Suno sa iya, nagsugod siya sa pagsuksok sang vest tubtob nga nag-full suit agud agaw atensyon sa madamo nga food stalls sa merkado.
Bangud sa iya kinalain nga porma, nag-viral ang iya mga video sa social media kag madamo nga turista ang nagakadto sa ila pwesto.
Kada adlaw, makaluto si Lu sang sobra 200 ka servings halin alas-5 sang hapon tubtob alas-11:30 sang gab-i. Suno sa iya, una nga nagapalapit ang mga tawo bangud sa curiosity, pero nagabalik sila bangud sa manamit nga sabor sang ila pagkaon.
