Nagabilin sa prisohan ang isa ka street level individual “SLI”, matapos nga nadakpan sa ginkasa nga drug buy-bust operation sang kapulisan sa Brgy. Punta Tabuc, Roxas City.
Ang suspek amo si alyas Mon, 45-anyos, isa ka tricycle driver kag residente sang Brgy. IX, Roxas City, kag lakip sa Provincial Priority Target List sa probinsya sang Capiz.
Sa interview sang Bombo Radyo kay Hon. Nestor Buenviaje, Punong Barangay sang Punta Tabuc, Roxas City, iya ginpahayag nga suno sa ginpatigayon nga operasyon sa idalum sang ila Station Drug Enforcement Team madinalag-on nga nadakpan ang subject person.
Suno kay Buenviaje, ginhatagan na sang tsansa ang subject person nga likawan ang pagpatigayon sang illegal nga bulahaton, apang nagliwat man ini sa gihapon.
Nakuha naman sa paghinakop ang ginabanta 1 grams sang ginapatihan shabu nga may street drug price sa kapin 6,800 pesos, lakip na ang drug buy-bust money.
Magapangatubang sa kaso nga paglapas sa Republic Act 9165 ukon Dangerous Drugs Act of 2002.
Nagpahanumdom naman ang natungdan sa mga pumuluyo nga likawan ang pagpatigayon sang illegal nga buluhaton agud mapabilin kag mamentinar ang kalinong kag katawhay sa palibot
