Nakabatyag ang Student Alliance of the Philippines (SAP) sang pagkadismaya matapos nga wala nalakip ang pila ka importante nga mga hagna sa mga pagatalakayon sa ipatawag nga special session sang Kongreso ni President Ferdinand Marcos Jr.
Sa interview sang Bombo Radyo kay Matthew Christian Silverio, National Secretary General sang nasambit ng grupo, iya ginpahayag nga apisar positibo ang ila pagbaton sa tikang sang administrasyon nga magpatawag sang special session para mahinalaan ang pila ka prayoridad nga mga hagna, may yara gihapon sang mga isyu nga kuntani mahatagan sang gilayon nga atensyon sang gobyerno.
Suno kay Silverio, isa sa mga prayoridad nga ila ginahingyo nga malakip sa agenda amo ang mga hagna nga may kaangtanan sa sektor sang enerhiya, labi na sa tunga sang padayon nga pagsaka sang presyo sang langis kag iban pa nga produktong petrolyo sa pungsod.
Pahayag pa niya, ginpasalamatan sa gihapon sang organisasyon ang gobyerno bangud nalakip sa mga pagatalakayon sang special session ang pila ka mga education-based bills nga makabulig sa kaayuhan kag interes sang mga estudyante.
Nagapati si Silverio nga importante nga mapadayon ang pagsulong sang mga hagna nga nagatutok sa pagpaayo sang kalidad sang edukasyon, pagpalapad sang access sa pag-eskwela kag paghatag sang dugang nga suporta sa mga estudyante sa nagkalain-lain nga bahin sang pungsod.
Ginpasiguro man sang natungdan nga padayon nila nga bantayan kag aktibo nga paga-updan ang mga diskusyon nahanungod sa mga hagna agud masiguro nga mabatian ang tingog sang kabataan sa paghulma sang mga polisa kag programa sang gobyerno.
