Naghatag sang suhestyon ang deputy spokesperson sang defense team ni Vice President Sara Duterte nga “high time” na agud athagon sang Senate Impeachment Court ang pagsulondan may kaangtanan sa sub judice rule.
Ini ang ginpahayag ni Atty. Justin Gular matapos ginpahayag ni Senate President kag Impeachment trial Presiding Officer Francis “Chiz” Escudero nga magapaguwa siya sang ruling sa Lunes, Agosto 17, may kaangtanan sa ginaalegar paglapas sa Rule 18 sang Senate Impeachment rules, nga nagalakip sa sub judice rule.
Suno kay Gular, kinahanglan nga ma-remind ang tanan nga partido nga respetuhon ang Rule 18 kag athagon sang impeachment court ang mga pagsulondan nga sundon sang mga counsels kag mga myembro sang korte sa ila mga public statements.
Nag-ugat ini sa ginpahayag nga concern sang defense team matapos ang Facebook post ni House prosecutor Amando Ligutan nga ginapatihan nagatumod sa diskusyon sa cross-examination, partikular sa ginaalegar nga “misleading” questions.
Suno naman kay Escudero, ginmanduan na niya ang clerk of court nga i-monitor ang mga pampubliko nga pahayag sang mga counsels sang duha ka partido sa nagligad nga semana, kag may isa ka team nga suno sa iya naglapaw na sa linya ukon nagalapas na sa ginapatuman nga pagsulondan.
Samtang, ginpahayag ni Gular nga wala sila nagpasaka sang formal motion batok sa social media statement ni Ligutan bangud nagasalig sila sa discernment kag prudent judgment sang impeachment court sa pag desisyon sa amo nga issue.
