Napasakaan na sang kaso sa idalom sang Republic Act 10591 ukon Comprehensive Firearms and Ammunition Regulation Act ang isa ka lalaki nga nadakpan sa buy-bust operation sa Barangay Santa Cruz, Ivisan, Capiz.
Ang arestado amo si alyas “Jes”, residente sang Barangay Lanot, Roxas City.
Sa interview sang Bombo Radyo kay Police Captain Rile F. Villariez Jr., Officer-in-Charge sang Ivisan Municipal Police Station, iya ginpahayag nga na-aktohan ang suspek nga nagabaligya sang unlicensed .38 caliber revolver.
Suno pa kay Villariez, narekober sa posisyon sang suspek ang isa ka homemade .38 caliber revolver kag tatlo ka live ammunition.
Nagpanugyan man ang kapulisan sa publiko nga likawan ang iligal nga pag-angkon kag pagbaligya sang armas luthang bangud ini may mabug-at nga penalidad sa idalom sang amo nga lahi.
