ROXAS CITY – At-large sa karon ang nagpalagyo nga subject person nga ginkasahan sang drug buy bust operation sa Barangay Poblacion, President Roxas Capiz, alas-8:12 kagab-i, Hunyo 26.
Ginkilala ang nalagyo kay Argie Buenafe Abarides, 23-anyos kag residente sang Sitio Gabaldon, sa nasambit nga barangay.
Sa impormasyon nga nakuha sang Bombo Radyo sa President Roxas MPS, nagpatigayon sang operasyon ang gintingub nga puwersa sang Provincial Police Drug Enforcement Unit (PPDEU), cluster Station Drug Enforccement Team (SDET) sang President Roxas, Pilar kag Pontevedra MPS, kag may koordinasyon sa PDEA-6, sa nasambit nga lugar.
Apang, sa pagtakup sang ila transakyon nga nahatag na sang suspek ang ginaalegar iligal nga droga sa nagpakilala nga pulis nga nagserbe poseur buyer, gilayon sini nga ginpatumba ang iya motorsiklo kag madasig nga nagdalagan padulong sa direksyon sang Poblacion Proper.
Nataban ni Abarides ang P1,000 nga buybust money, apang nabilin sini ang sachet sang ginaalegar iligal nga droga kag Honda nga motorsiklo nagaduag itom, apang wala sang plate number kag yabe.
Ginabulubanta nga may kabug-aton nga .5 gramo ang nakumpiskar nga suspected shabu kag may standard drug price nga P3,400.
Pagadal-on ang nakumpiskar sa Iloilo City para sa laboratory exam.
Sa pihak sini, natalana nga pasakaan sang nagakaigo nga kaso ang nakapalagyo nga subject person.
