IVISAN, CAPIZ- Napasakaan na sang kaso ang subject person sa ginpatigayon nga search warrant implementation sang mga kapulisan sa Barangay Poblacion Norte, banwa sang Ivisan.
Ang arestado amo si alyas “Mayok”, 42-anyos, isa ka construction worker kag residente sang nasambit nga lugar.
Sa interview sang Bombo Radyo kay Police Major Ruby Magallanes, Hepe sang Ivisan Municipal Police Station, iya ginpahayag nga ang nasambit nga search warrant ang gin-isyu kag ginpirmahan ni Hon. Lorencito B. Diaz, Acting Executive Judge, RTC 6th Judicial Region, Branch 17 Roxas City, Capiz nga may petsa Hunyo 16, 2025.
Madumduman nga nakuha sa paghinakop sang arestado ang isa ka unit sa improvised .38 caliber revolver nga may lima ka mga live rounds, M16 airsoft rifle, kag tatlo ka rounds sang .45 caliber nga bala, kag duha ka rounds sang .22 caliber.
Nagapangatubang sa karon sa kaso nga paglapas sa Republic Act 10591 ukon ang ‘Comprehensive Law on Firearms and Ammunition’ ang nasambit nga arestado.
Sa karon, nagapbilin ini sa kustodiya sang Ivisan Municipal Police Station para sa nagakaigo nga disposisyon.
Interviewed by Bombo Francis Biñas
