Napasakaan na sang kaso ang mga subject persons nga nadakpan sa ginpatigayon nga drug buybust operation sa Sitio Nasagud, Barangay Lanot, Roxas City.
Ang mga nadakpan amo sanday alyas buktot isa ka high-value individual, samtang ang tatlo naman ka mga street-level individual amo sanday alyas June, alyas Frans kag alyas toto.
Sa interview sang Bombo Radyo kay PCOL. Albert D. Tapulao, Provincial Director sang Capiz Police Provincial Office, iya ginpahayag nga natigayon nga madakpan ang mga subject person pinaagi sa gintingob nga operation sang Capiz Police Provincial Drug Enforcement Unit (PPDEU) kag Highway Patrol Group (HPG).
Narekober naman sa mga nadakpan ang tatlo (3) tanan ka sachet sang ginapatihan shabu nga ginabulubanta may kabug-aton nga 100 grams kag may standard drug price nga nagabalor sang P680,000.00 kag buy-bust money nga nagabalor sang P21,000.00.
Sa subong, yara na sa Roxas Component City Police Station ang mga Subject person kag ,magapangatubang sa kaso nga paglapas sa Republic Act 9165 ukon ang Comprehensive Dangerous Drugs Act of 2002.
