Gin-kompirmar sang isa ka barangay official nga ang lalaki nga subject person sa search warrant operation sang mga katapo sang Capiz Maritime Police Station ang indi pumuluyo sang barangay Milibili, Roxas City.
Matandaan nga ginkilala ang amo nga subject person sa kay alyas “Cesar”, yara sa legal nga pang-edaron kag temporaryo nga nagapuyo sa nasambit nga lugar.
Suno kay Hon. Ignacio Alaban, barangay kagawad sang barangay Milibili, Roxas City, ginpahayag nga posible taga Mindanao ang amu nga persona bangud ang apelyedo sini daw kaangay sa mga muslim kag wala sang record sa ila nga barangay.
Pahayag pa ni Alaban nga wala nila ini ginalauman nga may persona nga nagatiner sa ila nga barangay nga may ginatago ini nga “smuggled cigarettes” kag nakahibalo lamang ini sa operation nga ginpatigayon sang mga kapulisan.
Samtang, nakuha sa paghinakop sini ang anum (6) tanan ka mga dalagkuan nga karton nga nagaunod sang mga ginapahayag “smuggle cigarettes” nga may balor nga P300,000.
Sa karon, nagapabilin sa paghinakop sang Roxas City PNP, para sa nagakaigo nga disposisyon.
