ROXAS CITY – Nangin madinalag-on ang bloodletting activity sang Bombo Radyo Philippines ang Dugong Bombo 2020 New Normal sa pihak sang epekto sang Coronavirus Disease ukon COVID-19 Pandemic sa pungsod.
Mahibaluan nga wala pa nagasugod ang nasambit nga aktibidad madamo na sang mga tawo ang nagkadto sa civic center sang Barangay Tabuc, Pontevedra, Capiz agud magdonar sang ila hamili nga dugo sa mga pasyente nga nagakinahanglan.
Suno kay Punong Barangay Frederic Dullano nga madamo sang mga successfully blood donors ang nagdonar sang ila nga dugo sa nasambit nga bloodletting activity sang Bombo Radyo Philippines.
Kalakip sa mga blood donors ang gikan pa sa nagkalain-lain nga organisasyon, grupo ukon volunteers, LGU’s kag madamo nga iban pa.
Kadungan sini wala man nagakalipat ang mga tawo nga magsunod sa mga ginapatuman nga mga minimum health protocols.
Sa karon, naglab-ot sa kabug-usan nga 157 ang mga nagdonar sang ila hamili nga dugo.
