Ginlimitahan sang Sugar Regulatory Administration (SRA) ang pag-import sang artificial sweetener sa pungsod bangud sa kahadlok nga padayon ini nga makaapekto sa lokal nga industriya sang kalamay.
Sa idalum sang Sugar Order No. 5 nga gin-issue sang Agosto 8, kinahanglan ang clearance antes i-release ang mga imported artificial sweeteners, magluwas sa P25 kada kilo nga release fee kag iban pa nga mga dokumento.
Ang bag-o nga polisa nagasakop sang sucralose, aspartame, saccharin, acesulfame potassium kag processed stevia.
Suno sa SRA, madugay na nga nagareklamo ang industriya sang kalamay sa wala ginaregulate nga pag-import sang artificial sweeteners nga ginaalegar nagapanubo sang demand sa lokal nga kalamay.
Bangud sini, ginasiling nga naganubo ang farmgate nga presyo sang kalamay nga nagaapekto sa kita sang mga sugar planters kag millers.
