Ginkwestyon sang mga Barangay Officials sang brgy. Tacas Pontevedra, Capiz ang suhestyon sang Department of Public Works and Highways angut sa plano nga kay-uhon ang naguba nga covered gym matapos nga narumpag sang Enero 2026.
Sa interview sang Bombo Radyo kay Punong Barangay Joy Ramos, iya ginpahayag nga tuman ang pagkabalaka sang mga lokal nga opisyal sa seguridad sang mga pumuluyo kun ipatuman ang ginaduso nga pagkay-o, ilabi na nga tuman ka dako ang structural damage.
Ginpahayag sang Department of Public Works and Highways ang paggamit sang epoxy injection sa mga haligi kag pagkay-o sang atop sang pasilidad.
Suno kay Ramos, kulang pa ini kag posible nga makatuga sang peligro kun magpadayon ang paggamit sang nasambit nga covered gym.
Dugang pa niya nga bangud sang malapad nga kahalitan sa mga haligi, indi masiguro ang kabakod sang estraktura bisan matapos sang rehabilitasyon.
Ang covered gym ang may yara sang gin-alocar nga ₱4.8 million nga pondo.
Nagpanawagan naman ang barangay nga ikonsiderar ang mas komprehensibo nga rehabilitasyon ukon posible reconstruction agud masiguro ang kaluwasan sang publiko.
