Ginaimbestigaran pa sang Bureau of Fire Protection-Roxas City ang ginapatihan paghaboy sang upos sang sigarilyo nga posible nagtuga sang malapad nga grassfire sa nabukid nga bahin sang Barangay Lawaan, Roxas City.
Sa interview sang Bombo Radyo kay SFO1 Junemar Galve, Chief sang Public Information Unit sang Roxas City Fire Station, iya ginkumpirma nga base sa ila inisyal nga impormasyon, may naghaboy sang upos sang sigarilyo sa lugar antes nagtuga ang sunog.
Gin-athag ma sini nga under determination pa ang gintunaan sang insidente bangud padayon pa ang imbestigasyon sang ila mga imbestigador.
Nahibaluan man sa una nga impormasyon halin sa lugar nga may apat ka pamatan-on nga nagaedad sang 19-anyos ang nadakpan malapit sa area sang sunog kag duha sa ila ang nag-ako nga posible nga halin sa ila ginhaboy nga upos sang sigarilyo ang nagtuga sang kalayo sa kabukiran.
Sandig sa datos sang BFP-Roxas City, naglab-ot sa 30,000 square meters ang land area nga naapektuhan sang grassfire. Maswerte naman nga wala sang pamalay ukon residente nga nahalitan sa insidente.
Pahayag pa ni Galve nga isa sa masami nga rason sang grassfire sa syudad amo ang accidental nga paghaboy sang upos sang sigarilyo ilabi na subong nga mainit kag mamala ang panahon.
Dugang pa sang natungdan, ipapatuman ang fire safety measures pareho sang indi paghaboy sang upos sang sigarilyo bisan diin, paglikaw sa pagsunog sang basura kag pagpanghawan sang mga hilamon malapit sa pamalay agud malikawan ang kaangay nga insidente.
