ROXAS CITY – Nakasumiter na ang hepe sang Provincial Engineer’s Office sang reply sa palamangkutanon sang Commission on Audit (COA) angut sa wala mapirmahan nga papeles may kaangtanan sa infrastructure project sang nagligad nga del Rosario administration.
Ginpahayag ni Provincial Engineer Edgar Agana kun may kapaslawan man nga wala sini ma-review ang proyekto ukon wala mapirmahan ang program of works sang pila ka mga infra projects, kapaltahan ini sang nagligad nga administrasyon bangud suop na sa oras sang ginpadala sa iya talatapan ang mga papeles.
Suno kay Agana nga madamo na nga beses nga ginbypass ini sang nagligad nga administrasyon sa diin may mga proyekto sila nga ginpatuman nga wala nag-agi sa iya talatapan kag sang nakaangkon sang problema, nagpangayo sang bulig sa iya nga iya man ginbuligan.
Ginapanindugan sang opisyal nga wala sini mapirmahan ang dokumento bangud magluwas nga wala sa ila opisina nag-agi ang dokumento, kinahanglan pa sini nga makumpara ang plano kag ma-imbestigahan ang lugar nga patigayunan sang proyekto.
Magluwas sini, ginpahayag ni Agana nga wala man nag-release sang pondo ang del Rosario administration nga ila kuntani gamiton sa pagpatigayon sang survey, bangud wala sang surveyor ang ila nga talatapan.
