Posible nga magasulod sa Philippine Area of Responsibility (PAR) ang Super Typhoon Champi sa Martes, Oktubre 20 nga ginalauman nga makaapekto sa pila ka bahin sang northern Luzon sa katapusan sang semana suno sa PAGASA.
Sa tion nga makasulod na ini sa PAR, pagatawgon na ini nga Bagyong Rosal.
Base sa pinakaulihi nga report sang PAGASA, nagapabilin sa guwa sang PAR ang bagyo. Mahimo nga maapektuhan sini ang pila ka bahin sang Cagayan Valley kag ang naaminhan nga bahin sang Ilocos Region sa tion nga makasulod na ini sa PAR.
Sa data nga ginpaguwa, nasiplatan ang Super Typhoon Champi sa kalayuon nga 2,000 kilometers sa sidlangan sang southeastern Luzon, nga may kabaskugon sang hangin nga nagalab-ot sa 185 kph malapit sa sentro kag pagmadlos tubtob 230 kph.
Nagahulag ini pa-West sa kadasigon nga 20 kph.
Nagpaandam ang PAGASA sa posible pagbaha kag pagkatiphag sang duta sa mga lugar nga maka-eksperyensya sang kasarangan tubtob mabaskog nga pag-ulan, ilabi na kun magdugay ini.
Ginapanugyanan ang publiko, ilabi na ang mga yara sa northern Luzon, nga padayon nga bantayan ang mga masunod nga abiso sang PAGASA bangud posible nga magbag-o ang direksyon kag hulag sang bagyo.
