ROXAS CITY – Makabig nga mas mabaskog pa sa super typhoon Yolanda nga nag-igo sa Pilipinas sang Nobyembre 8, 2013 ang sa karon nagapanghangkat man nga super typhoon nga si Hinnamnor nga may kabaskugon nga hangin nga 195kph kag may gustiness nga 240km.
Ini ang ginpahayag ni Cesar Aspera, Weather Observer sang Philippine Atmospheric Geophysical and Astronomical Services Administration (PAGASA)-Capiz sang mainterview sang Bombo Radyo.
Suno diri, samtang ginasubay ni Hinnamnor ang kadagatan may posibilidad nga magbaskog pa ini antes maglandfall.
Sa pihak sini, stationary kag diritso ang hulag ni Hinnamnor kun sa diin may posibilidad man nga magluya.
Gina-ekspektar nga magsulod sa PAR si Hinnamor karon sa gab-i apang Northern part sang Luzon lang ang maapektohan sini kag luwas ang probinsya sang Capiz.
Samtang ang tropical depression nga si Gardo ang yara sa karon sa 1,130 km sang nasidlangan sang Extreme Northern Luzon, may kabaskugon ang hangin sini nga 55 kph kag gustiness nga 70 kph.
Ginapahayag nga wala sang mangin direkta nga epekto ang tropical depression nga si Gardo sa kondisyon sang panahon kag kondisyon sang kadagatan sa mga baybayon sa pungsod apang ginapahayag amat-amat ini nga ginahigop ni super typhoon Hinnamnor.
