Ginalauman nga magabubo ang Super Typhoon Leon sang masobra 200 millimeters ukon 1 bulan nga kabaylo sang pag-ulan sa Batanes kag Cagayan kalakip ang Babuyan islands subong nga Miyerkules, Oktubre 30, suno sa state weather bureau.
Sa heavy rainfall outlook sang ahensiya, posible nga maeksperyensyahan ini subong nga adlaw sa nasambit nga mga lugar bangud sa mabaskog kag padayon nga pag-ulan.
Posible man nga mapagkit ang 100 tubtob 200 millimeters nga kadamuon sang pag-ulan sa iban pa nga lugar kaangay sang Ilocos Norte, Apayao, Isabela kag Occidental Mindoro kung sa diin ginalauman ang heavy to intense nga ulan.
Samtang, ang katamtaman tubtob mabaskog nga pag-ulan ang mangin resulta sang 50 tubtob 100 millimeters nga pag-ulan sa Ilocos Sur, Abra, Kalinga, Benguet, La Union, Pangasinan, Calamian Islands, Occidental Mindoro kag Antique.
Sa mga lugar naman sa Metro Manila, Visayas kag nabilin nga parte sang Luzon, posible nga maka-eksperyensya sang magal-umon nga langit nga may laka-laka nga pag-ulan-ulan kag thunderstorm bangud sa trough ukon ikog sang bagyo.
Kaangut sini, ginapahanumdum ang mga residente ilabi na ang mga yara sa manubo nga lugar kag prone sa landslide kag baha nga magpatigayon sang preemptive evacuation agud malikawan ang anu man nga untoward incident .
Ginalauman naman nga magapalapit ang direksiyon sang bagyong Leon sa Batanes sa aga tubtob sa udto bwas nga adlaw Huwebes.
