ROXAS CITY – Nagapabilin pa nga bastante ang suplay sang bugas sa National Food Authority (NFA) Capiz.
Ini ang ginpahayag ni NFA Capiz Assistant Provincial Director Aurelio Villasis sang mainterview sang Bombo Radyo.
Suno kay Villasis nga sa karon may yara pa sang 167, 862 sacks sang NFA milled rice ang talatapan sa ila nga warehouse sa Barangay Bolo, Roxas City nga ginalauman nga bastante pa sa sulod sang kapin 29 diyas.
Suno diri nga may mga local government units (LGU’s) na nga nag-order sang bugas sa talatapan nga amo ang ginpanghatag sa mga residente nga apektado sang Enhanced Community Quarantine (ECQ) sa probinsiya bangud sang coronavirus disease (COVID-19) pandemic.
Suno diri nga kalakip sa ila una nga na-release amo ang 5, 000 sacks sa lokal nga gobyerno sang Roxas City; 2, 000 sacks sa Ivisan; 2, 000 sacks sa Tapaz; 1, 000 sacks sa Jamindan; 500 sacks sa Pontevedra; kag 1, 000 sacks sa Sapian.
Sadtong Abril 4 suno kay Villasis, natigayon naman nga ma-release ang 1, 000 sacks sa lokal nga gobyerno sang Panit-an; 400 sacks sa Sigma; 500 sacks sa Cuartero; kag dugang nga 500 sacks sa Pontevedra.
May gin-release man nga 500 sacks sang bugas sa Office of the Vice Governor.
May yara naman sang ginpa-reserba nga bugas sa talatapan ang mga lokal nga gobyerno sang Dumalag, Dumarao, Maayon, Mambusao, Pilar, kag President Roxas.
