ROXAS CITY – Supisyente ang suplay sang isda sa probinsya sang Capiz sa karon nga mga tinion.
Ini ang ginpahayag ni Mr. Ruben Agnas, administrative assistant sang Libas Fishing Port, sang mainterview sang Bombo Radyo.
Suno diri, nagaabot ang tion nga ginakulang ang suplay sang isda kun mag-abot ang malain nga panahon, apang kun wala sang mga weather disturbances, maayo ang panguha sa kadagatan sang syudad.
Aminado man ini nga mataas ang presyo sang isda bangud indi lang taga-Capiz ang nagapangumpra kundi pati man ang kaiping nga mga probinsya kaangay sang Iloilo, Aklan, Negros kag Antique, bangud diri, mataas man ang demand, nga posible rason sa pagtaas sang presyo.
Ginpahayag man sini nga ginasunod sang amu nga pantalan ang istrikto nga pagsulundan ilabi na sa karon nga nagatinaas ang numero sang nagapositibo sa COVID-19 sa syudad sang Roxas.
Matandaan nga sa bahin sang nasyunal, ginpahayag nga plano sang aton gobyerno nga mag-import sang isda bangud sa ginaalegar kakulangon sa suplay, apang diri sa bug-os nga probinsya sang Capiz, makasiling ang tagdumalahan sang Libas fishing port nga bastante ang suplay sang isda sa probinsya.
